Subsidiya qanday tartibda olinadi va kimlarga beriladi

Bugun uy-joy olish uchun subsidiyaga ariza berish boshlandi!

Bugun, ya’ni 15 maydan boshlab Bozor tamoyillariga asoslangan ipoteka kreditlari orqali aholini uy-joy bilan ta’minlash dasturi doirasida subsidiyaga ariza qabul qilish jarayonlari boshlandi.

Ushbu maqola orqali siz subsidiya olish mavzusiga oid barcha savollaringizga batafsil javoblar olishingiz mumkin.

Subsidiya o‘zi nima?

Subsidiya – daromadi yuqori bo‘lmagan shaxslarga ipoteka kreditlari asosida uy-joy sotib olishlari uchun boshlang‘ich badal yoki kredit foiz to‘lovlarining bir qismini qoplab berish maqsadida davlat byudjetidan qaytarib berilmaydigan mablag‘lar.

Boshlang‘ich badal - bu birlamchi bozordagi (ya’ni, yangi qurilgan) uy-joylarni sotib olish uchun ajratiladigan pullar. Shahar va qishloq joylarda ularning qiymati har xil bo‘ladi.

Subsidiya, shuningdek ipoteka krediti bo‘yicha foizlarni qoplash uchun ham berilishi mumkin.

Masalan, siz yangi turarjoy majmuasidan narxi 300 mln so’mlik kvartira xarid qilmoqchisiz. Birlamchi ipotekada boshlang’ich to’lov sifatida uyning 15% quyiladi. Demak, siz olmoqchi bo’lgan kvartiraning boshlang’ich to’lovi 45 mln so’m bo’ladi. Mazkur summaning 30 mln so’m qismini sizga davlat tomonidan to’lab beriladi, qolgan 15 mln so’mni esa o’zingiz to’laysiz.

Joriy yildagi qonunchilikdagi o’zgarishlar asosida foiz to‘lovlarining bir qismini qoplash uchun — kredit muddatining birinchi besh yili davomida 12 foizdan oshgan qismiga subsidiya to‘lanadi.

Eslatib o’tamiz, birlamchi uy bozori (vazirlar mahkamasi tomonidan tasdiqlangan nizomga asosan qurib foydalanishga topshirilganiga 3 yildan oshmagan, pudrat tashkiloti tasarrufida bo’lgan 4 va undan yuqori qavatli qurilgan uy joy) uchun ipoteka kreditlari ajratish yo’lga qo’yilgan. Iqtisodiyot va Moliya Vazirligi bilan kelishilgan holda, Moliya vazirligidan olingan mablag‘lar asosida fuqarolarga 20 yil muddatga yillik o’rtacha 18% to’lash sharti bilan Toshkent shahrida joylashgan ko’p qavatli binolardan uy-joy olish uchun 416,500,000 so’mgacha, Toshkent shahridan tashqaridagi barcha hudud Qoraqalpog’iston Respublikasi va viloyatlar hududida qurilgan ko’p qavatli binolardan uy-joy olish uchun 327,000,000 so’mdan oshmagan miqdorda ipoteka krediti ajratiladi.       

Subsidiya kimlarga beriladi?

Subsidiya mablag‘lari faqatgina uy-joy sharoitini yaxshilashga muhtoj bo‘lgan, daromadi yuqori bo‘lmagan hamda og‘ir ijtimoiy vaziyatga tushib qolgan fuqaro va oilalarga, 18 yoshdan 60 yoshgacha bo‘lgan O‘zbekiston Respublikasi fuqarolariga ajratiladi.

Daromadi yuqori bo‘lmagan fuqaro yoki oila - qonunchilik hujjatlariga muvofiq aniqlanishi mumkin bo‘lgan o‘rtacha oylik daromadlar miqdori:

Qoraqalpog‘iston Respublikasi va viloyatlarda belgilangan mehnatga haq to‘lashning eng kam miqdorining 2,7 baravaridan 8 baravarigacha;

Toshkent shahrida belgilangan MHTEKMning 2,7 baravaridan 9,2 baravarigacha bo‘lgan oilalardir.

Masalan, agar siz Qoraqalpog‘iston Respublikasi va viloyatlarning birida istiqomat qilsangiz va sizning maoshingiz 2 646 000 so‘mdan 7 840 000 so‘mgacha bo’lsa, sizda subsidiya olish imkoniyati yuqoriroq.

Agar sizning yashash joyingiz Toshkent shahrida bo’lsa, subsidiya olish uchun oyligingiz 2 646 000 so‘m - 9 016 000 so’m oralig’ida bo’lishi lozim.

Subsidiya olish uchun ariza berish tartibi

Ariza berish uchun istalgan tuman (shahar) Davlat xizmatlari markaziga kelib murojaat qilishingiz yoki my.gov.uz portali orqali elektron tarzda ro‘yxatdan o’tishingiz mumkin.

Subsidiyalar faqatgina ariza beruvchining ro‘yxatdan o‘tgan hududi bo‘yicha beriladi.

Agar fuqaro mehnat migranti bo‘lgan taqdirda, uning nomidan oila a’zolari (notarial tartibda tasdiqlangan ishonchnoma asosida) ham ariza berishi mumkin.

Subsidiya olishda ballar nimani anglatadi?

Mas’ul organlar vakillaridan shakllantirilgan maxsus komissiya ariza beruvchilarga mezonlar bo‘yicha ball beradi.

Ijtimoiy mezonlar uy-joy sharoitini yaxshilashga muhtoj fuqarolarni aniqlashga xizmat qiladi.

Ball to‘plash uchun mezonlarga talabgor va (yoki) uning oilasining daromadi (shahar va qishloq joylari uchun alohida ko‘rsatkichlar belgilangan), turar joy maqomi (ijara yoki shaxsiy mulk), ijtimoiy himoyaga muhtoj bo‘lganlar (mehnat migrantlari, yetim va ota-onasining qaramog‘idan mahrum bo‘lgan bolalar, yolg‘iz ayollar va hokazo), shuningdek, oilada nogironligi mavjud bo‘lgan shaxslar inobatga olinadi.

Subsidiya tartib bo‘yicha yuqori ball to‘plaganlarga beriladi.

Subsidiya ajratish uchun qaysi vaqtda arizalar qabul qilinadi?

Arizalar tasdiqlangan parametrlar doirasida 15 maydan 1 noyabrga qadar qabul qilinadi.

Ushbu muddat tugagandan keyin taqdim etilgan arizalar ko‘rib chiqilmaydi.

Subsidiyani necha marotaba olsa bo‘ladi?

Ajratiladigan subsidiya bir oilaga (eri yoki xotiniga) faqat 1 (bir) marta beriladi.

Kvartira sotib olish yoki yakka tartibdagi uy-joylarni qurish va rekonstruktsiya qilishga beriladigan ipoteka krediti bo‘yicha subsidiya ajratish to‘g‘risidagi xabarnoma berilgan vaqtidan boshlab 12 oy davomida amal qiladi.

Joriy yilda Ipoteka kreditlarini moliyalashtirishga O‘zbekiston Respublikasi respublika budjeti, “O‘zbekiston ipotekani qayta moliyalashtirish kompaniyasi” AJ hamda banklarning o‘z mablag‘lari hisobidan kamida 17 trillion so‘m mablag‘ yo‘naltirilgan.

Shuningdek, Kambag‘allikdan chiqarish dasturiga kiritilgan va uy-joy sharoitini yaxshilashga muhtoj bo‘lgan shaxslarga yakka tartibdagi uy-joy qurish, rekonstruksiya qilish va ta’mirlash uchun 120 million so‘mgacha ipoteka kreditlarini ajratilgan.

Subsidiyaga oid boshqa ma’lumotlar bilan ushbu ilova orqali tanishishingiz mumkin.