Ishonchli qurilish kompaniyasini qanday tanlash kerak?

Yangi xonadon sotib olmoqchimisiz? Ammo uni qurayotgan qurilish kompaniyasiga ishonchingiz komil emasmi?

Soʻnggi paytlarda Oʻzbekistonda koʻp qavatli uy-joy qurilishi tobora ortib bormoqda. Afsuski, qonuniy tartiblarga amal qilmaydigan va fuqarolarning ishonchiga kirib, ularni aldov yoʻli bilan mablagʻidan mahrum qilmoqchi boʻlgan qurilish tashkilotlari ham uchramoqda. Shuning uchun ham ishonchli quruvchi tanlash bugun eng dolzarb masalalardan biridir.

Quyida sizga qurilish kompaniyasini tekshirish va tanlash bo‘yicha muhim tavsiyalarni taqdim etamiz:

 

1. Quruvchining rasmiy ro‘yxatdan o‘tganligini tekshiring.

Qurilish tashkilotining qonuniy faoliyat yuritayotganini bilish uchun Qurilish va uy-joy kommunal xoʻjaligi vazirligining elektron platformasidan foydalaning.

https://mc.uz/ulushdor/ havolasi orqali qurilayotgan obyekt va quruvchi tashkilotlar ro‘yxatdan o‘tganini tekshirishingiz mumkin. Bu yerda:

1) Quruvchi nomi.

2) Qurilish manzili.

3) Loyihaning huquqiy holati kabi muhim maʼlumotlar ochiq koʻrinadi.

Eslatma! Elektron platformadan roʻyxatdan oʻtmagan qurilish kompaniyalari ulushdorlarning mablagʻlarini jalb qilish va uyni reklama qilish huquqiga ega emas!

2. Qurilish maydonchasidagi QR-kodli pasportni tekshiring.

Bu pasport barcha obyektlarga tizim yordamida berilgan boʻlib, uni obyektda koʻrinarli joyga ilib qoʻyish majburiy.

Qurilish obyektidagi QR-kodli pasportni smartfon orqali skanerlab, quyidagi maʼlumotlarni bilib olasiz:

1) Qurilish obyekt nomi, obyekt joylashgan maydoni, obyekt joylashgan manzili.

2) Quruvchi, loyihachi va pudrat tashkilotlari haqidagi maʼlumotlar.

3) Qurilish muddatlari va foydalanishga topshirish sanasi.

Bundan tashqari, obyekt manzili belgisi yonida xarita boʻlib, xaritaga bosganingizda obyektning real joylashuvi haqida maʼlumotni olishingiz mumkin. Agar obyekt maʼlumotlari sizga taqdim qilingan maʼlumotlar bilan mos kelsa, demak, bu qurilishda davlat nazorati tizimida qonuniy roʻyxatdan oʻtgan qurilish hisoblanadi.

3. Qurilish kompaniyasining obro‘si va tajribasini tekshiring.

Qurilish kompaniyasining rasmiy veb-saytiga tashrif buyuring. Bugungi kunda deyarli barcha qurilish kompaniyalarining oʻz veb-saytlari mavjud. Ushbu saytlarda barcha maʼlumotlar va yangiliklar muntazam ravishda kiritib boriladi. Xususan, quyidagilarga eʼtibor qarating:

1) Tugallangan loyihalar.

2) Sharhlar va mijozlarning fikrlari.

3) Kompaniyaning bozordagi tajribasi.

Shuningdek, internet va ommaviy axborot vositalari orqali kompaniya haqida maʼlumot to‘plang.

4. Hujjatlar bilan tanishing.

Yerni ajratish hujjatlari: Uchastka qanday maqsadda ajratilganini aniqlang.

Qurilish hujjatlari: Ruxsatnomalar va loyiha hujjatlari bor-yoʻqligini tekshiring.

Muddatlar: Qurilish qachon tugashini aniqlashtiring va kelishuvga shartnoma orqali rozi boʻling.

5. Qurilish jarayonini kuzatib boring.

Ulushdor sifatida siz quyidagi huquqlarga egasiz:

1) Qurilish obyektidagi jarayonlarni shaxsan tekshirish.

2) Quruvchi kompaniyasidan yozma maʼlumot talab qilish.

3) Mablagʻlarning qanday ishlatilayotganini nazorat qilish.

Qurilish tashkiloti sizning talablaringizni bajarishi shart va uning faoliyati davlat nazorati ostida boʻladi.

Uy-joy sotib olayotganda shoshilmang! Qurilish kompaniyasining qonuniy faoliyat yuritayotganini, loyihaning barcha talablariga javob berishini tekshiring. Faqatgina ishonchli quruvchilarga murojaat qilib, orzuingizdagi uyni xavfsiz va qonuniy asosda sotib olishingiz mumkin.