Ipoteka 2025: Shavkat Mirziyoyev raisligidagi videoselektor yakunlari

23-Yanvar sanasida Oʻzbekiston Respublikasi Prezidenti Shavkat Mirziyoyev raisligida ipoteka dasturi doirasida 2024-yilda amalga oshirilgan ishlar va 2025-yil uchun rejalar muhokamasi yuzasidan yig‘ilish boʻlib oʻtdi. Unda bir qator muhim masalalar boʻyicha soʻz yuritildi.

2024-yilda amalga oshirilgan ishlar.

- 2024-yilda100 mingdan ziyod xonadonga ega 2 ming 44 ta ko‘p qavatli uy barpo etildi. Jon boshiga uy-joy hajmi 19 kvadrat metrdan oshdi (2020-yilda 16 kvadrat metr bo‘lgan).

- 2024-yili uy-joy qurilishida Toshkent shahri, Navoiy, Buxoro, Xorazm va Samarqand viloyatlarida ishlar yaxshi tashkil qilingani aytildi.

2025-yilda: “Yangi Oʻzbekiston” massivlari.

Endilikda “Yangi O‘zbekiston” massiviga berilgan yer bo‘yicha loyihalashni 2 oydan, qurilishni boshlashni 3 oydan oshirishga yo‘l qo‘yilmasligi, agar bu talab buzilsa, yer qaytarib olinib, qayta auksionga chiqarilishi, shuningdek, loyiha ekspertizasini 15 kundan o‘tkazib yuborgan tashkilotlarning litsenziyasi to‘xtatib qo‘yilishi aytildi.

100 emas, 50 foiz!

Yig‘ilishda ta’kidlanganidek, developerlar tomonidan obyektning 50 foizi qurilganda, fuqarolar kredit va subsidiya olishi mumkin. Ushbu tartib nafaqat imtiyozli, balki tijorat ipotekasi uchun ham.

Shuningdek, quruvchi tashkilotlar qurilishni boshlaganidan yakunlagunicha, lekin ko‘pi bilan 12 oyda yer solig‘i to‘lashdan ozod qilinadi. Obyekt muddatida topshirilmasa, developer yer solig‘ini 2 karra miqdorda to‘laydi.

2030-yilgacha 100 ta “Yangi O‘zbekiston” massivi!

Yigʻilishda taʼkidlangandek, “Yangi O‘zbekiston” massivi uchun berilgan yerlarning 10 foizi developerlarga tijorat binolarini qurishi uchun yagona lot sifatida savdoga chiqariladi.

Bu uylarni pastki qavatida xususiy bog‘cha tashkil qilishga ruxsat berilishi, ular mulk solig‘idan ham ozod qilinishi ta’kidlandi.

Mamlakatimizda 2030-yilgacha kamida 100 ta “Yangi O‘zbekiston” massivini qurish reja qilingan.

Yangi massivlar uchun yerlar kamida 70 ming odam yashaydigan tuman markazi yoki shahar hududiga 1-2 kilometr masofadagi joydan ajratiladi. Bu massivlarning har birida 100 ming kvadrat metr xonadon quriladi.

Mehnat migrantlariga ham ipoteka krediti beriladi, agar...

Maʼlumki, hozirda xorijga ishlashga ketganlarga “O‘zbekistonda rasmiy daromadi yo‘q”, degan vaj bilan kredit va subsidiya berilmayapti.

Yigʻilishda Prezidentimiz mutasaddilarga xorijda mehnat qilayotgan va 6 oy ichida muntazam pul o‘tkazib kelayotgan fuqarolarimiz daromadini hisobga oladigan tizim yaratishni topshirdi.

Qurilish jarayoni yanada soddalashtiriladi.

Hozir pudratchilar qurilishni boshlash uchun hujjatlarni kamida 5 bosqichda kelishishi kerak. Bunga 2 oygacha vaqt ketyapti. Bu jarayonlar soddalashtirilishi e’lon qilindi.

Quruvchilar “Shaffof qurilish” platformasi orqali tayyor loyihani idoralar bilan onlayn kelishadi. Ular kamchilik ko‘rsatsa, bartaraf qiladi.

Qurilish loyihaga mos bajarilishini Qurilish sohasida nazorat inspeksiyasi tekshiradi va bitganidan keyin xulosa beradi. Obyektni foydalanishga topshirishda faqat 2 ta idora – QSNI va yong‘in xavfsizligidan xulosa olinadi. Zarur bo‘lsa, boshqa sohadagi mutaxassislarni inspeksiyaning o‘zi jalb qiladi.

2025-yilda 120 ming xonadonli ko‘p qavatli uylar qurilishi hisob-kitob qilingan.

Bunga qo‘shimcha 15 ming xonadon Yangi Toshkentda barpo qilinadi va bu uylarda “yashil” energiyadan foydalaniladi.

Energiya barqarorligini ta’minlash uchun xususiy sheriklik asosida 100 megavatt-soat sig‘imli elektr saqlash quvvati o‘rnatiladi.

Yangi Toshkentdagi uylarni isitish va sovutish markazlashgan trigeneratsiya tizimi orqali bo‘ladi.

Barcha bino-inshootlarga yuqori energiya samaradorlik talablari joriy qilinadi. Transport, yoritish tizimlari va zaryadlash stansiyalari faqat “yashil” talablar asosida bo‘ladi.

 

“Yashil energiya”li uylar.

Prezidentimiz umuman barcha hududlarda yangi qurilayotgan ko‘p qavatli uylarni bosqichma-bosqich “yashil energiya” uylariga aylantirish muhimligini ta’kidladi.

Buni rag‘batlantirish maqsadida quriladigan uy-joyni energiya bilan ta’minlash uchun quyosh elektr stansiyalari bilan shartnoma tuzgan developerlarga bunday uylar uchun foyda solig‘i olinmaydi, kredit stavkasi 2 foiz arzon qilib beriladi.

Natijada developerning xarajati kamayadi, undan uy olgan odamlarga esa elektr arzonroq bo‘ladi.

Bunday “yashil uylar” quradigan developerlarga xalqaro liniyalardan mablag‘ jalb qilish imkoniyatlari keskin oshadi.

2025-yilda ipoteka krediti.

2025-yilda uy-joy dasturlarini moliyalashtirishga budjetdan 15,5 trillion so‘m resurs berilayotgani taʼkidlandi.  

Banklar bunga qo‘shimcha 10 trillion so‘m yo‘naltirishni maqsad qilgani, “Ipoteka kompaniyasi” ham bu maqsadlarga 2,3 trillion so‘m resurs yo‘naltirishi aytildi.

Mutasaddilarga 2025-yilda kamida 70 mingta xonadon uchun ipoteka krediti taqdim etish, shundan 30 mingi uchun kreditni boshlang‘ich badal uchun budjetdan subsidiya to‘lab, daromadi yuqori bo‘lmagan oilalarga berish vazifasi qo‘yildi.

Fuqarolarga to‘lagan mablag‘ining bir qismi keshbek qilib qaytarilishi mumkin...

Qurilishga salohiyatli developerlarni jalb qilish maqsadida bundan buyon ko‘p qavatli uy qurish uchun yerlar auksionda faqat QQS to‘lovchi yuridik shaxslarga sotilishi belgilandi.

Shuningdek, renovatsiya asosida bu yil 20 ming xonadon qurilishini tashkil qilish zarurligi qayd etildi.

Sohada yashirin iqtisodiyotni yanada qisqartirish uchun yangi uy-joy oladigan fuqarolarga o‘zi to‘lagan mablag‘ining bir qismini keshbek qilib qaytarish bo‘yicha takliflar ishlab chiqish topshirildi.