Qanday qilib kvartira xarid qilish uchun kredit olish mumkin?

 

Hozirgi kunda mamlakatimizda kvartira xaridi uchun koʻplab tijorat banklari tomonidan turli shartlar evaziga ipoteka kreditlari taklif etilyapti. Ushbu maqolada kredit olish shartlari, qaysi banklar qanday shartlarda taklif etayotgani, bankni tanlash mezonlari boʻyicha tavsiyalar berilgan.

Ipoteka krediti.

Ipoteka krediti — bu, sodda qilib aytganda, uy-joy xarid qilish uchun muayyan garov (ko‘chmas mulk) evaziga bank tomonidan beriladigan qarz.

Ipoteka krediti mablag‘i evaziga siz uy-joy xarid qilishingiz mumkin, to‘lovni esa belgilangan muddat davomida qismlarga bo‘lib to‘lab borasiz.  Ipoteka mablag‘lari 20 yilgacha bo‘lgan muddatga beriladi.

Shunday qilib, ipoteka kreditini muayyan foiz evaziga bank taqdim etadi. Boshlang‘ich to‘lovni kiritgandan so‘ng ipoteka krediti yordamida xonadon uchun qolgan to‘lovlarni amalga oshirishingiz mumkin.

Ipoteka kreditlari bo‘yicha davlat dasturlari mavjud. Ular sizga qulay shartlarda va pastroq foizlarda kredit olish imkonini beradi.

Ipoteka bitimi amalga oshirilgandan so‘ng qarz oluvchi darhol uy-joy egasiga aylanadi va u olingan uy-joyda yashash, uni ijaraga berish, qarindoshlarini ro‘yxatga olish huquqiga ega bo‘ladi.

Ipoteka hisobiga olingan ko‘chmas mulk bilan amalga oshirib bo‘lmaydigan ishlar bu uni sotish, almashtirish yoki vasiyat qilishdir. Bularning barchasiga ipoteka krediti to‘liq to‘langanidan keyin ruxsat beriladi.

Deyarli barcha banklar ipotekani muddatidan oldin to‘lash imkoniyatini beradi. Agar ortiqcha mablag‘ingiz paydo bo‘lsa, kreditni muddatidan oldin to‘lashingiz mumkin, foiz to‘lovlari esa bir necha barobar kamayadi.

Ipoteka kreditini olishingiz mumkin, agar...

Buning uchunsizda murojaat vaqtida nomingizda boshqa ipoteka krediti mavjud bo‘lmasligi, 18 yoshga to‘lgan va doimiy daromadga ega bo‘lishingiz, doimiy daromadga ega bo‘lishingiz kerak.

Ushbu resurs hisobidan kreditlar quyidagi maqsadlarda ajratiladi:

1) birlamchi bozor;

2) ikkilamchi bozor;

 

Banklar tomonidan taqdim etilayotgan birlamchi va ikkilamchi ipoteka kreditlari.

1) Birlamchi ipoteka kreditlari.

Mazkur ipoteka kreditlari Iqtisodiyot va moliya vazirligi hamda Ipotekani qayta moliyalashtirish kompaniyasi mablag‘lari hisobidan moliyalashtirilmoqda.

Iqtisodiyot va moliya vazirligi mablag‘lari hisobidan:

Kredit shartlari:

• muddati – 20 yil;

• boshlang‘ich to‘lov – 15 foizdan boshlab;

• kredit foizi – 16,5-17,5%;

Qaysi banklar - Xalq banki, Agrobank, O‘zSQB, Ipoteka-bank, O‘zmilliybank, MKBank, Hamkorbank,  Aloqabank, BRB, OFB, Turonbank, Trastbank, Asia Alliance bank.

Ipotekani qayta moliyalashtirish kompaniyasi mablag‘lari hisobidan:

Kredit shartlari:

• muddati – 20 yil;

• boshlang‘ich to‘lov – kamida 25 foiz;

• kredit foizi – 21,5%;

Kredit ajratuvchi banklar:

Qaysi banklar - Xalq banki, Hamkorbank, Infinbank, Agrobank, Asakabank, Ipoteka-bank,  O‘zSQB.

2) Ikkilamchi ipoteka kreditlari.

Ayrim banklar tomonidan ikkilamchi bozor uchun ipoteka kreditlari ajratilmoqda. Muddati 10 yildan 20 yilgacha boʻlib, boshlangʻich badal 25-26 foizni tashkil etmoqda. Kredit foiz stavkasi esa 21,99 foizdan 27 foizgacha.

Qaysi banklar - Ipoteka-bank, Turonbank, Infinbank,  Tenge Bank, BRB,  Hamkorbank.

Toshkent shahrida 800 mln so‘mgacha, hududlarda 500 mln so‘mgacha miqdorda ajratilishi belgilangan.

Kvartira uchun kredit olish bo‘yicha tavsiyalar

1. Oilaviy budjetga e’tibor qaratish.

Kredit olishdan oldin oylik to‘lovlaringiz va boshqa xarajatlaringizni hisoblab chiqing. Ijara to‘lovlarini to‘lashdan ko‘ra, kredit orqali o‘zingizga mulk xarid qilish manfaatliroq bo‘lishi mumkin.

2. Qo‘shimcha xarajatlarni hisobga olish.

Kredit olish jarayonida notarius xizmatlari, rieltor yordami va sug‘urta xarajatlari yuzaga kelishi mumkin. Bu xarajatlarni oldindan rejalashtiring.

3. Foiz stavkasini solishtirish.

Turli tijorat banklarining kredit shartlarini chuqur tahlil qiling. Ayrim banklar dastlabki to‘lovni kamaytirgan holda yuqori foiz taklif qilishlari mumkin.

4. Qisman oldindan to‘lov imkoniyati.

Ba’zi banklar kreditni muddatidan oldin qisman yoki to‘liq yopish imkonini beradi. Bu orqali foiz to‘lovlarini qisqartirish mumkin.

Bilasizmi, kvartira xarid qilish uchun kredit olish jarayonida o‘z imkoniyatlaringiz va bank shartlarini to‘g‘ri baholash juda muhim. Har bir bankning shartlarini chuqur o‘rganib, oilaviy budjetga mos keladigan variantlarni tanlang. Ha, aytgancha, doimiy daromad va yaxshi kredit tarixiga ega bo‘lish orqali qulay shartlarda ipoteka kreditini olish mumkin.