Uy-joy xaridorlarini davlat tomonidan qo‘llab-quvvatlash: Hozirda qanday dasturlar amalda?

 

Soʻnggi yillarda mamlakatimizda aholining turmush darajasini oshirish va ularning uy-joy sharoitlarini yaxshilashga alohida e’tibor qaratilmoqda. Hukumatimiz tomonidan ishlab chiqilgan turli dasturlar orqali aholining turli qatlamlari uchun qulay shartlarda uy-joyga ega bo‘lish imkoniyatlari yaratilgan. Quyida hozirgi kunda amalda bo‘lgan asosiy dasturlar haqida batafsil ma’lumot beramiz.

Subsidiyalar.

 Subsidiyalar — daromadi yuqori bo‘lmagan shaxslarga ipoteka kreditlari asosida uy-joy sotib olishlari uchun boshlang‘ich badal yoki kredit foiz to‘lovlarining bir qismini qoplab berish maqsadida davlat budjetidan qaytarib berilmaydigan mablag‘lardir.

 Boshlang‘ich badal — bu birlamchi bozordagi (ya’ni yangi qurilgan) uy-joylarni sotib olish uchun ajratiladigan pullar.

 Subsidiyalar kimlarga beriladi?

 Eslatib o‘tamiz, mazkur mablag‘lar faqatgina uy-joy sharoitini yaxshilashga muhtoj bo‘lgan oilalar, og‘ir ijtimoiy vaziyatga tushib qolgan xotin-qizlar, mamlakat ijtimoiy hayotida faol ishtirok etayotgan yoshlar va shu toifadagi boshqa O‘zbekiston fuqarolariga ajratiladi.

 Subsidiya olish uchun fuqaro 18 yoshga to‘lgan bo‘lishi kerak. Agar fuqaro mehnat migranti bo‘lganda, uning nomidan oila a’zolari ham ariza berishi mumkin.

Endilikda ipoteka subsidiyalari berish tartibida sezilarli o‘zgarishlar amalga oshirildi. Vazirlar Mahkamasining qaroriga asosan, endi subsidiyalar faqat uy-joy sotib olish uchun beriladi. Murojaatlar endi subsidiya.idm.uz maxsus platformasi orqali ko‘rib chiqiladi. Yagona interaktiv davlat xizmatlari portali (my.gov.uz) orqali berilgan arizalar ham avtomatik ravishda ushbu platformaga yo‘naltiriladi.

“Ayollar daftari”dagi uy-joy boʻyicha imtiyozlar.

2020-yilda xotin-qizlar muammolarini o‘rganish va manzilli hal etish maqsadida “Ayollar daftari” joriy etildi. “Ayollar daftari”ga kiritilgan va belgilangan talab hamda mezonlarga toʻgʻri kelgan xotin-qizlarga quyidagicha koʻmak koʻrsatilishi belgilangan:

1) Ehtiyojmand xotin-qizlarni uy-joy bilan ta’minlash;

2) Ularning ijara to‘lovlarini to‘lab berish (turar joy ijarasi uchun to‘lovlarning 50 foizi, lekin ko‘pi bilan 500 ming so‘mgacha bo‘lgan qismi “Ayollar daftari” jamg‘armasi hamda Qoraqalpog‘iston Respublikasi respublika budjeti, viloyatlar va Toshkent shahar mahalliy budjetlari mablag‘lari hisobidan qoplab beriladi);

3) Ehtiyojmand xotin-qizlarning uy-joylarini ta’mirlab berish (Bunda har bir uy-joyni ta’mirlash ishlariga «Ayollar daftari» jamg‘armasi hisobidan bazaviy hisoblash miqdorining 30 baravarigacha miqdorda mablag‘ ajratiladi).

Bilish muhim: “Ayollar daftari”ga kiritilgan xotin-qizlar va ularning birga yashaydigan oila a’zolari boshqa dasturlar doirasida, homiylik yoki boshqa mablag‘lar hisobidan uy-joy bilan ta’minlangan yoxud uy-joy sharoitlarini yaxshilash bo‘yicha ijtimoiy yordam (ko‘mak) olgan yoki imtiyozlardan foydalangan xotin-qizlarga mazkur Nizom asosida turar joy ijara kompensatsiyasi ajratilmaydi.

“Mahalla yettiligi” tavsiyasi asosida imtiyozli ipoteka krediti.

Hukumatning “Mahalla yettiligi” tavsiyasi asosida kambag‘allikdan chiqarish dasturiga kiritilgan va uy-joy sharoitiga muhtoj bo‘lgan shaxslarga ipoteka kreditini ajratish tartibi to‘g‘risidagi nizomni tasdiqlash haqida”gi qarori qabul qilingan.

Unga ko‘ra:

➖ yakka tartibdagi uy-joyni qurish, rekonstruksiya qilish va ta’mirlash maqsadlari uchun Markaziy bankning asosiy stavkasidan to‘rt foiz bandga yuqori stavkada (17,5 foiz) 120 mln so‘mgacha miqdorda, 20 yilgacha muddatda ipoteka kreditlari ajratiladi;

➖ ipoteka krediti bo‘yicha dastlabki badalning bir qismini qoplash uchun kreditning 15 foizi miqdorida hamda foiz to‘lovlarining ma’lum bir qismini qoplash uchun kredit muddatining birinchi besh yili davomida 12 foizdan oshgan qismiga subsidiya to‘lab beriladi;

➖ mazkur ipoteka kreditlari qoida tariqasida Agrobank, Xalq banki, Mikrokreditbank va Biznesni rivojlantirish banki tomonidan ajratiladi;

➖ mazkur ipoteka kreditlari bo‘yicha dastlabki badal va foiz xarajatlarining bir qismini qoplash bo‘yicha subsidiyalar “subsidyplatform.mf.uz” platformasi orqali ajratiladi.

“Mahalla yettiligi” – mahalla raisi, hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim, va soliq inspektoridan iborat jamoa.

Davlat tomonidan uy-joy xaridorlarini qo‘llab-quvvatlash bo‘yicha ko‘plab dasturlar amalda bo‘lib, ularning har biri aholining turli ehtiyojlarini qondirishga qaratilgan. Bu imkoniyatlardan unumli foydalanib, har bir fuqaro o‘z uyiga ega bo‘lish imkoniyatiga ega. Agar siz uy-joy xarid qilishni rejalashtirayotgan bo‘lsangiz, ushbu dasturlarni o‘rganib chiqish va sizga mos keladiganini tanlashni tavsiya qilamiz.