Yangi uyni taʼmirlash: qayerdan boshlash va pulni qanday tejash kerak?

Uy sotib oldingiz. Shubhasiz, bu siz va oila aʼzolaringiz hayotidagi unutilmas voqealardan biri hisoblanadi. Biroq, ko‘p hollarda uy ayrim taʼmir turlarini talab qiladi. Yoki yangi xonadonni oʻzingiz xohlagan koʻrinishga keltirishni istab qolasiz. Agar taʼmirlash ishlari rejasiz amalga oshirilsa, bu ko‘p vaqt va mablag‘ni sarflanishiga olib keladi. Quyida taʼmirlash jarayonini osonlashtirish va pulni tejash bo‘yicha foydali maslahatlar bilan bo‘lishamiz.

1. Avvalo, taʼmirlash rejasini toʻgʻri tuzib olish lozim.

Taʼmirlashni boshlashdan oldin batafsil reja tuzish juda muhim. Quyidagilarni rejangizga kiritishni maslahat bergan boʻlardik:

Taʼmirlashning asosiy maqsadini aniqlab oling: Bu kosmetik taʼmirmi yoki kapitalmi?

Kosmetik taʼmir - bu ta’mirlash turi yuzaki o‘zgarishlar kiritishga va uyni estetik ko‘rinishini yaxshilashga qaratilgan. Kosmetik ta’mir odatda arzonroq, tezroq va katta tuzatishlar yoki qayta qurishlarni talab qilmaydi.

Bajariladigan ishlar ketma-ketligi: Avvalo taʼmirlash-tiklash ishlari, keyin esa dekorativ, yaʼni bezatish bosqichlarga o‘tish tavsiya etiladi.

Budjetni belgilash: Har bir ish uchun qancha mablag‘ ajratishni aniq belgilang. Boshqacha aytganda, taʼmirlash ishlarini boshlashdan oldin, choʻntakka bir nazar tshlash zarar qilmaydi.

Rejalashtirishning ahamiyati shundaki, u sizga ortiqcha xarajatlarni oldini olishga yordam beradi.

2. Uy-joyning holatini tekshiring.

Taʼmirlashni boshlashdan oldin uyning muhim qismlarini tekshirish zarur:

1) Elektr tarmoqlari, sanitariya quvurlari va isitish tizimi ishlash holatini baholang.

2) Pol, devor va tom holatini tekshiring.

3) Qurilish materiallari zarar ko‘rmaganiga ishonch hosil qiling.

Agar bu ishlarni eʼtiborsiz qoldirsangiz, kelajakda jiddiy muammolarga duch kelishingiz mumkin. Masalan, uyni bahor-yoz fasllarida sotib olsangiz-u, kamchiliklariga eʼtiborsiz boʻlsangiz, ushbu kamchiliklar esa oʻzini kuz-qish mavsumida “eslatishi” mumkin. Shunda, qolgan ishga qor yogʻadi...

3. Ishni eng muhim qismlardan boshlang.

Avvalo zaruriy tuzatish ishlari bilan shug‘ullaning:

1) Yaroqsiz sanitariya quvurlari yoki elektr tarmoqlarini almashtirish.

2) Derazalarni issiqlikni saqlash xususiyatiga ega bo‘lgan turlarga almashtirish.

3) Zarar ko‘rgan joylarni mustahkamlash yoki qayta tiklash.

Bu qadamlar uyni yanada qulay va xavfsiz qilish uchun xizmat qiladi.

4. Zamonaviy texnologiyalardan foydalaning.

Energiya tejamkor yoritish tizimlari: LED lampalar.

Isitish tizimlari: Zamonaviy konditsioner yoki energiya tejamkor qozonlar.

Aqlli uy texnologiyalari: Masalan, masofadan boshqariladigan yoritish tizimi yoki termostat.

Ushbu yechimlar nafaqat qulaylikni oshiradi, balki vaqt o‘tishi bilan xarajatlarni qisqartirishga yordam beradi.

5. Tejamkorlik - yaxshi fazilat!

Taʼmirlashda pulni tejashning bir qancha usullari mavjud:

Qurilish materiallarini to‘g‘ri tanlash: Mahalliy ishlab chiqaruvchilar mahsulotlarini xarid qilish nafaqat arzonroq, balki sifatli materiallarni sotib olishga yordam beradi. Chunki bugungi kunda mamlakatimizda qurilish yoʻnalishida koʻplab sifatli materiallar ishlab chiqarilmoqda.

Qo‘lda bajariladigan ishlar: Baʼzi ishlarni o‘zingiz amalga oshirishingiz mumkin, masalan, devorlarni bo‘yash yoki polni yotqizish.

Chegirmalar va aksiyalarni kuzatib boring: Qurilish materiallari va mebel xarid qilishda yaxshi takliflarni kuting. Ayniqsa, turli bayram va muhim sanalarda bu kabi aksiyalar koʻplab oʻtkazilmoqda.

Ikkinchi qo‘l buyumlar: Baʼzan ishlatilgan, lekinyaxshi holatda bo‘lgan jihozlarni arzon narxda topish mumkin.

6. Soha mutaxassislariga murojaat qilishni unutmang.

Baʼzi ishlar professional yondashuvni talab qiladi. Bu elektr tizimini o‘rnatish, quvur yotqizish va boshqa murakkab ishlarni o‘z ichiga oladi. Ishni yaxshi bajara oladigan tajribali mutaxassislarni tanlashga harakat qiling.

7. Dekor va mebel tanlashga eʼtibor bering.

Taʼmirlashning oxirgi bosqichi – bu uyga shaxsiy ruh bag‘ishlaydigan dekor va mebel tanlashdir.

1) Ko‘p funksiyali mebel tanlang, bu kichik xonalarda qulay bo‘ladi va keyinchalik xonada ayrim oʻzgarishlar qilishda asqatadi.

2) Ranglar uygʻunligini bir xil uslubda saqlashga harakat qiling.

3) Dekorativ buyumlar, masalan, pardalar, gilamlar va suratlar bilan xonangizni bezang.

8. Nihoyat, oxirgi bosqichga ham keldik.

Uy-joyingizni koʻnglingizdagidek taʼmirlab boʻlgach, tozalash va jihozlarni joylashtirishga vaqt ajrating. Hamma narsani tartibga solib bo‘lgach, ishoning, yangi uyingizda dam olishdan zavq ola boshlaysiz.

Aslida yangi uyni taʼmirlash jiddiy jarayon, lekin ishlar to‘g‘ri rejalashtirilsa, tejamkorlikka amal qilinsa, bu ishni samarali va arzon amalga oshirish mumkin. Avvalo, pul va vaqtni tejash uchun reja tuzib oling, soha mutaxassislariga murojaat qiling va zamonaviy texnologiyalarni qo‘llash ham foydali boʻladi. Shunda yangi xonadoningiz nafaqat go‘zal, balki qulay va zamonaviy uyga aylanadi.