2025-yilda Ipoteka Subsidiyalari: Yangi Qoidalar va Imkoniyatlar

2025-yildagi ipoteka subsidiyalari tasdiqlandi!

O‘zbekiston Respublikasi Prezidenti tomonidan 2025-yil 21-fevralda qabul qilingan PF-26-sonli farmon bilan respublikada uy-joy va ipoteka bozorini rivojlantirish bo‘yicha qo‘shimcha chora-tadbirlar belgilandi.

Ushbu dastur doirasida bozor tamoyillariga asoslangan ipoteka kreditlari, subsidiya orqali aholini uy-joy bilan ta’minlashning asosiy yo‘nalishlari belgilab olindi.

Subsidiya oʻzi nima?

Subsidiyalar - daromadi yuqori bo‘lmagan shaxslarga ipoteka kreditlari asosida uy-joy sotib olishlari uchun boshlang‘ich badal yoki kredit foiz to‘lovlarining bir qismini qoplab berish maqsadida davlat byudjetidan qaytarib berilmaydigan mablag‘lardir.

Kimlarga beriladi?

Mazkur mablag‘lar faqatgina uy-joy sharoitini yaxshilashga muhtoj bo‘lgan oilalar, og‘ir ijtimoiy vaziyatga tushib qolgan xotin-qizlar, mamlakat ijtimoiy hayotida faol ishtirok etayotgan yoshlar va shu toifadagi boshqa O‘zbekiston fuqarolariga ajratiladi.

Subsidiya olish uchun fuqaro 18 yoshga to‘lgan bo‘lishi kerak.

Qanday hujjatlarni taqdim etish kerak?

– pasport;

– oila a’zolarining pasporti va nikoh qayd etilganligi guvohnomasi (to‘liq oila va voyaga yetgan farzandi(lari) bo‘lganda) va farzandlarining tug‘ilganlik haqidagi guvohnomalari (agar voyaga yetmagan bo‘lsa) nusxasi;

– nikoh bekor qilinganligi haqidagi guvohnoma yoki nikoh haqiqiy emas deb topilganligi to‘g‘risidagi sud qarori (nikoh qayd etilgan hollarda) va oilaviy holati to‘g‘risida FHDYO organlari arxividan ma’lumotnoma nusxasi (nikoh qayd etilmagan hollarda);

– doimiy propiska joyidan kadastr raqami va turiga tegishli ma’lumotlar;

– doimiy propiska joyidan uy daftarining yoki kvartira kartochkasining (17-shakl bo‘yicha) nusxasi;

– ariza beruvchi va birgalikda qarz oluvchilarning daromadi hamda ushlab qolingan daromad soliqlari haqida ma’lumotnoma (qo‘shimcha daromadlar bo‘lsa soliq deklaratsiyasi).

Qanday ariza berish kerak?

1) Arizalar my.gov.uz portali yoki Davlat xizmatlari markazlari orqali topshiriladi.

2) DXM orqali murojaat qilinganda ariza 1 soat ichida tizimga kiritiladi.

2025-yil 3-mart kuni soat 09:00 dan boshlab ipoteka kreditlari uchun subsidiya olish istagida bo‘lgan fuqarolar Davlat xizmatlari markazlariga shaxsan tashrif buyurish yoki "my.gov.uz" platformasi orqali ariza topshirishlari mumkin

Subsidiyaga ariza berish uchun fuqaroning va uning yaqin qarindoshlarining o‘rtacha daromadi quyidagi me’yorlarga mos bo‘lishi kerak:

Qoraqalpog‘iston Respublikasi va viloyatlarda — mehnatga haq to‘lashning eng kam miqdorining 2,7 baravaridan (3 mln 118 ming 500 so‘m) 8 baravarigacha (9 mln 240 ming so‘m);

Toshkent shahrida — mehnatga haq to‘lashning eng kam miqdorining 2,7 baravaridan (3 mln 118 ming 500 so‘m) 9,2 baravarigacha (10 mln 626 ming so‘m);

Talabgorning o‘z nomida yoki yaqin qarindoshlarining nomida O‘zbekiston bo‘ylab boshqa uy-joyi mavjud bo‘lmasligi lozim.

Arizalarni kim baholaydi?

Ariza berishda ko‘rsatilgan ma’lumotlarning aniqligi avtomatik tizimlar orqali tekshiriladi. Baholash jarayonida:

Soliq organlari,

Iqtisodiyot va moliya bo‘limlari ishtirok etadi.

Arizalarni baholashda nafaqat ariza beruvchining va uning turmush o‘rtog‘ining daromadlari, balki kafillik qiluvchilarning yaqin qarindoshlari daromadlari ham hisobga olinadi. Baholash uchun 12 oy mobaynidagi o‘rtacha daromadlar asos qilib olinadi.

Baholash muddati

Arizalarni baholash jarayoni 5 ish kuni. Ariza ma’lumotlari avtomatik ravishda quyidagi idoralar tizimlari orqali tasdiqlanadi:

Ijtimoiy himoya milliy agentligi,

Adliya vazirligi,

Kadastr agentligi,

Bandlik vazirligi.

Buyurtmanomalarni to‘lov tartibi

Tijorat banklari buyurtmanomalarni Bosh ofis orqali Iqtisodiyot va moliya vazirligiga taqdim etadi. To‘lovlar 5 ish kuni ichida amalga oshiriladi.

Farmon: 2025-yilda 135 mingta “novostroyka” quriladi

Farmonga koʻra, hududlarda jami 8,1 mln kv.metr maydonda 135 mingta “novostroyka” qurilishi rejalashtirilgan. Buning uchun 20,9 trillion so‘m ipoteka kreditlari ajratiladi.

Shu bilan birga, ipoteka kreditlari bo‘yicha subsidiya olish imkoniyatlari sezilarli darajada oshirildi.

Jumladan, subsidiya ajratish hajmi o‘tgan yilga nisbatan 1,5 baravarga oshirilib, bu imkoniyatdan 30 ming nafar fuqaro foydalana oladi. Buning uchun budjetdan 2,5 trln soʻm yoʻnaltiriladi.

Respublikada ipoteka bozorini rivojlantirishga qaratilgan ushbu yangi chora-tadbirlar fuqarolarga uy-joy sotib olish uchun qulay imkoniyatlar yaratadi.

Ayniqsa, subsidiya sonining oshirilishi va uy-joy qurilishida yangi sharoitlarning belgilanishi natijasida qurilish sohasi ham tezroq rivojlanib, aholining uy-joy bilan ta’minlanish darajasi ortadi.